WC19 – Alldag un Bord 🚢

 

An wat mécht een dann esou déi ganz Séideeg un Bord? – Eent viraus – et langweilt een sech net..

Déi meeschten Zäit geet drop mat Fotoen sënneren; verschaffen an Posten virbereeden fir hei ob den Site ze setzen. Am Schnëtt hunn Ech probéiert een Post pro Séidaag fäerdeg ze kréien.

Donieft heescht et awer och déi nächst Destinatiounen ze preparéieren. All Moies ass eng Konferenz iwwert eist nächst Ziel. Dës Konferenzen ginn an den 5 geleefegen Sproochen hei vum Schëff gehalen (Italienesch, Spuenesch, Franséisch, Däitsch an Englesch ) an vun verschidden Konferenzieren. Do kréien mer en éischten Iwwerbléck iwwert dat wat ob eis duerkënnt an dann heescht et sech zesummen setzen an plangen, reservéieren etc. Mir sinn eng Equipe vun 7 an probéieren en Maximum ob eis selwer ze ënnerhuelen, well ob den Excursiounen vum Schëff huet een ëmmer en strengen Zäitplang- an meeschtens net genuch Zäit fir eppes am Fong ze kucken- net ze schwätzen dat déi Excursiounen natierlech ëmmer am groussen Gruppen (bis zu 50 Leit) stattfannen. Dat heescht awer am Virfeld eng gutt Preparatioun fir dann un Land keng Zäit ze verléieren. Dat ass net ëmmer einfach wëll den Internet ob Séi ass luuues.

Dann ginn et awer och nach déi méi spezifesch Konferenzen iwwert Delfinen, Walen, Geschicht vun der Äerd, Kenstler, Humor, Téi ect. Sproochcoursen ginn et am Englesch, Italienesch an Spueneschen .

Danzen: et ginn all Dag eng 8 Danzstonnen – vum Cha-Cha-Cha iwwert den Tango, Merengue kann een alles leieren. Thematesch Danzcoursen ginn et dann passend zou der Géigend wou mer grad sinn – Huladanz zu Hawai; Hakadanz an Neiseiland; Square Country an Australien – wou dann och ëmmer eng Trupp mat un Bord ass fir eis dat beizebrengen. An all Owend gëtt ob d’mannst ob 3 Danzpisten Livemusek gespillt fir ze danzen. 

Musek um Schëff ass souwisou ëmmer an iwwerall – am Schnëtt spillen all Dag eng 5-6 Livebands an dat iwwert den Dag verdeelt an Owes an sämtlechen Bar’en. Et gëtt en klasseschen Ensemble deen ëffentlech Prouwen huet an vun Zäit zu Zäit en Spektakel gëtt. Sangen leieren kann een natierlech och.

Sport: Pro Séidaag ginn et 6 Sportscoursen (vun Aerobic, Zumba bis Bio Dance ass alles derbäi) déi een beleeën kann an dat nieft dem Fitnessstudio deen och nach emol alles ubitt.

Donieft kann een sämtlech Kaartespiller leieren (Bridge; Canasta ect) , et ginn Molcoursen; Bastelcoursen; Origami etc.

Ob den Iwwerfaarten mat méi Deeg gëtt et dann nach den Trivia – en Quiz iwwert puer Deeg- all Dag ginn 10 Froen gestalt déi direkt an der Equipe (6-10 Leit) mussen beäntwert ginn – ouni Hëllefsmëttel wei Internet oder Bicher – mat richteg schwéieren allgemengen Froen. Mir bäissen eis heiansdo d’Zënn drun aus. (Beispill: Weivill Faarwen sinn am Fändel vun Südafrika oder weivill Quadrater huet en Schachbriet?)

All Owes ginn et zwee Spektakelen am Theater. Fir déi ganz Rees sinn insgesamt 96 (!) verschidden Spektakelen virgesinn- dovunner sinn der ronn 40 vun der hauseegener Danz an Gesangstrupp – déi d’Spektakelen un Bord astudéieren an se dann an engem Owend 2 mol obfeieren.

Déi restlech Showen sinn vun Externen déi kuerzfristeg ob d’Schëff kommen oder en Deel vun der Rees matmaachen. Et geet vun Danz – Gesang – Akrobatik bis Illusionisten etc. An ëmmer vun enger excellenter Qualitéit.

An dann gëtt natierlech gefeiert… Themenowenter ewéi White Night, Piratesnight; 70er Party;………Valentinsdaag; Fraendaag; Fuesend; St. Patricksday; ëmmer mat passendem Buffet an passender Party.

• 

• 

• 

• 

• 

• 

• 

An passend zu all Destinatioun kennt dann eng Musek – Folklor oder Gesangstrupp un Bord- heiansdo esou guer fir eng Iwwerfaart – an presentéiert eis hier Dänz an Traditiounen.

• 

• 

An dann ass do nach d‘Iessen : Et ass en italienescht Schëff an sou ass och d’Iessen – einfach nëmmen gutt! Et gëtt en Buffet wou een 20 vun 24 Stonnen iessen kann an dann ginn et nach d’Restauranten wou een Moies, Mëttes an Owes zerwéiert gëtt mat Menüen vun 3 Gäng. Natierlech ass d’Kichen ëmmer passend zu den Destinatiounen an am ganzen kommen nach emol 8 renomméiert Chef’en un Bord fir eis hiren Stärenmenü ze kachen.

D’Quantitéiten déi hei verschafft ginn sinn enorm. An der Moyenne ginn fir 30 Deeg verbraucht:

• 80.000 Fläschen Waasser
• 11.500 Fläschen Béier
• 12.500 Kilo Gefligel
• 41.250 Kilo Uebst
• 6.750 Kilo Reis……

Et kann een natierlech och einfach nëmmen relaxen, d’Sonn genéissen an et fënnt een ëmmer en Eckelchen wou grad keng Animatioun ass an wou et méi roueg ass- noutfalls um Balcon an der Kabinn.

• 

• 

• 

🌏 Fazit ass dat déi 53 Seédeeg vun den 119 Deeg vun der Rees duerchaus néideg sinn fir alles ze verschaffen an sech tëschend den Destinatiounen ze erhuelen. Ech wëllt se net mëssen – an wien sech hei langweilt oder wiem Zäit laang gëtt ass sécher selwer schold. Mir genéissen all Dag – un Bord – an och un Land. Heiansdo muss een sech selwer erënneren...Ech setzen am Mier vun Jawa bei 30°C an sinn derbäi 1 mol ronderëm d’Welt ze fueren. 🌍

Déi ganz Rees ass allefalls eng wahnsinneg Organisatioun an et kritt een immens gebueden. De ganzen Staff ass immens léif an hëllefsbereet an et kann een just festhalen dat et eng eenzegaarteg Erfarung ass déi méi schéin net kennt sinn.

 “ Travel makes one modest. You see what a tiny place you occupy in the world.” –

Gustav Flaubert.